Global Citizens

Nakilala ko si Anna sa Woo bar, isa sa mga upscale na tambayan ng mga businessmen at turista dito sa Taipei.  Nag-strike siya kaagad sa akin kasi sa dinami-dami ng mga nagsisilbi sa pool side area sa 10th floor ng W hotel, kaisa-isang Caucasian si Anna sa grupo ng mga Taiwanese staff. Kaagad niya akong binati at ang kaibigan kong Kastila at matalas kong natunugan sa kanyang pag-iingles na mayroon siyang French accent.

“You’re French?” agad kong inusisa.

Ngumiti muna si Anna bago siya sumagot. “Actually, I’m Austrian.”

Parang mabilis na MTV na umandar sa utak ko ang mga images ng Vienna coffee, ang mukha  nina  Beethoven, Mozart at Strauss. Ang Vienna Boys’ choir at ang mga palasyo ng Belvedere at Salzburg.

Napukaw agad ang curiosity ko kaya sunod-sunod ang mga tanong ko kay Anna.  Ayon sa kanyang kuwento, napadako raw siya sa Taipei kasi natanggap siya bilang Maitre d intern sa W hotel. Kumukuha raw siya ng kursong hotel and restaurant management at kinailangan niyang mag-internship sa isang foreign five-star hotel sa loob ng kalahating taon.

Tanong ulit ako: “Your accent is very French. How many languages do you speak?”

Natawa na naman si Anna at napansin ko na kahit na may kaliitan siya (siguro mga 5 ft lang ang height niya), napaka-charming at maamo ng kanyang mukha. “I don’t wanna sound like bragging. But lemme see….I speak Austrian, English, French, Italian, German, a little bit of Spanish, and since I stayed in Thailand for many years, I can also speak Thai.”

Na-tameme ako kasi bihira akong makakilala ng multilingual na tao. Pero itong Austrian na kaharap ko nakakapagsalita raw siya ng at least seven languages. Impressive.

Sa pabalik balik niya sa aming mesa, kinastila siya ng kaibigan kong Espanyol at panandalian akong nawala sa kanilang balitaktakan. Bagama’t may working knowledge naman ako sa Spanish language, hindi ko kayang makaagapay sa bilis at tatas ng mga Spanish locals. Napansin kaagad ni Anna na nakikinig ako.

“And you are from? Don’t tell me you’re Thai?”

“No, I’m from the Philippines,” sagot ko.

Automatic na hinawakan ni Anna ang kanyang pisngi. “Oh my God! I was raised by a Filipino nanny in Spain. Her name is Rosa and she’s great!”

Tingnan mo nga naman, sabi ko sa sarili. Kahit saang konbersasyon sa kahit na anong sulok ng mundo, lumalabas lagi sa kuwento ang mga Pinoy. Sa pakikipag-usap ko sa mga kaibigan kong foreigner, lagi nilang naisisingit na mayroon silang kapitbahay na Pinoy, kaibigang Pinoy, katulong na Pinoy, hipag at bayaw na Pinoy, kababatang Pinoy. Na hindi naman kataka-taka kasi kahit nga raw sa mga war-torn countries gaya ng Syria, mayroon pa ring nagtatrabaho at naninirahang Pinoy. Gaya ni Anna na Austrian by birth pero lumaki at nagkaisip sa iba’t-ibang bansa, parami nang parami na rin ang mga Pinoy ang matatawag na global citizens.

Ang engineer na tiga Bulacan na nagtatrabaho sa Dubai at nakapag-asawa ng isang Moroccan at ngayon ay naninirahan na sa Ireland.

Ang dating manikuristang tiga Sampaloc na nag-DH sa Hongkong at nakapag-asawa ng isang British.

Ang band singer na tiga Surigao na gabi-gabi ay kumakanta sa isang cruise ship na nagbibiyahe mula Singapore patungong Europe.

Ang Professor sa UP na nag-Ph.D sa Cambridge at ngayon ay nagtuturo sa isang university sa Sweden.

Ang college dropout na dating tambay sa Cubao at ngayon ay isa ng financial analyst sa New York.

Ilan lamang sila sa daan-daang libong mga Pinoy na gaya ni Anna na nakikipagsapalaran, nagtatagumpay, paminsan-minsan ay nabibigo at nasasaktan, pero bumabangon at patuloy na lumalaban.

Kakaiba na ang pananaw nila sa mundo. Ang bibilis nilang mag-adapt sa iba’t-ibang sitwasyon at makisalamuha sa kahit na anong uri ng tao. Iba ang angkin nilang talino kasi  hindi nila ito inaral sa libro kundi dala nilang karanasan sa  kanilang paglalayag at paglalakbay

Unti-unti ko rin silang nakikilala at pinag-aaralan dahil sanlaksang leksyon ang natututunan ko sa kanila. —Thank you Google images for the picture

world-flags-globe

About pinoytaipeiboy

Pilipinong nagtatrabaho sa Taipei. Mahilig magbasa, magsulat, kumain, manood ng sine, gumala, maglakbay at matulog. Interesado sa milyon-milyong bagay.
This entry was posted in Reflections, Taiwan Life. Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s